Ресейдің Украинаға жүргізіп жатқан соғысына қарсы тәуелсіз журналист Лұқпан Ахмедияров еліміздің ойыншық дүкендерінің бірінде Z белгілері бар әскери ойыншықтар емін еркін сатылып жатқанын көргені туралы мәлімдеді.
“Балалар әлемі” деген бейкүнә аты бар жергілікті ойыншықтар дүкеніне бардық. Келсек мұнда осындай белгілері бар (Z белгілері – ред.) ойыншықтар тұр. Әскери жүк көліктері, броньды машиналар, тікұшақтар мен ұшақтар. Барлық жапсырмаларда «Ресей Федерациясының Қарулы Күштері» деген жазу бар. Тіпті Ресей гвардиясының эмблемалары бар бірнеше полиция вагондарын да байқадық. Мұндай ойыншықтарды не үшін сатып жатқандарын сұрау үшін сатушының шақырдық. Екі сатушы түсіндірудің орнына: «Бұл жай ойыншықтар және бұл жай ғана сіздің пікіріңіз» деген сарындағы ойын айта бастады. Полиция шақыруға мәжбүр болдық”, – деп жазды журналист Facebook парақшасында.
Оның сөзінше, полиция келгенге дейін оқиға орнына дүкеннің иелері келген.
“Келген полиция қызметкерлері мені тыңдап, дүкеннің сатушылары мен иелеріне бұл ойыншықтарды сөрелерден өз еркімен алып тастауды ұсынды. Дүкен қожайындары өздері де соғысқа, мұндай соғысты насихаттауға қарсы екендіктерін айтып, Z таңбалары бар мұндай ойыншықтар кездейсоқ тап болғанын айта бастады. Қысқасы, алдырып тастадық”, – дейді Ахмедияров.
Бұл бір ғана ойыншық дүкенінде тіркелген факт. Журналист келмей тұрып, осындай қанша ойыншық сатылып үлгергені белгісіз. Еліміздің басқа дүкендерінде соғысты насихаттайтын ойыншықтардың сатылып жатқанын қадағалайтын құзырлы орган бар ма?
