Украина Грузия билігінен бұрынғы президент Саакашвилиге кіргізуді талап етті. Ол денсаулығының күрт нашарлағанына байланысты түрмеден ауруханаға жеткізілген болатын. Дәрігерлер екі жылдан бері абақтыда отырған Грузияның үшінші президентінің жағдайы ауыр деп отыр. Екі рет жариялаған аштықтан кейін ол отыз килограмм салмақ тастағаны өз алдына, неврологиялық ауыр дертке шалдыққан дейді.
Украина омбудсмені Дмитро Лубинец 15 желтоқсанда Телеграм-парақшасында Саакашвилидің медициналық көмекке зәру болып отырғанын және оны Батыс Еуропа мен АҚШ-қа емдеуге жіберу қажеттігін айтты. Лубинецтің айтуынша, Украина шетелдегі азаматтарының құқықтары мен мүдделерін қорғайды.
2004-2013 жылдары аралығында Грузияны басқарған Саакашвили «билік өкілетін асыра пайдалану» бабы бойынша айыпталып, алты жыл түрмеге кесілген. Өзі мен жақтастары істің саясиланғанын айтады.
Заңгерлер оның жазасын өтеуді кейінге шегеріп, шетелге емдеуде жіберу үшін рұқсат алуға күш салып жатыр.
16 желтоқсанда жемқорлықпен күресіп жүрген ондаған белсенді Тбилисиде парламент алдында наразылық өткізіп, Саакашвилиді шетелдің ауруханасына ауыстыруды талап етті.
14 желтоқсанда Грузияның қылмыстық атқару қызметі Саакашвили емделіп жатқан ауруханадан видео жариялап, экс-президенттің «денсаулығына қауіп жоғын» мәлімдеген. Алайда жақтастары оның қатты салмақ жоғалтқанын алға тартып, емдеуге зәру екенін айтып отыр.