Жамбыл облысында лауазымды шенеунікке 90 млн теңге пара бергендер 10 жылға сотталып кетті.
Облыстық соттың мәліметінше, 2024 жылғы наурызда сағат 01:30 шамасында сотталушылар М. және Т. «Тараз қаласының қаржы бөлімі» КММ басшысы – У.А.С.-қа (сыбайлас жемқорлыққа қарсы қызметтің бақылауымен) сот үкімі бойынша жойылуға жататын 2 мың қорап (1 млн қорап темекінің баламасы) мөлшерінде темекі өнімін алғаны үшін «Қаржы бөлімі» КММ статист – азамат К. арқылы, делдал – сотталушы У.-ның (Жамбыл облысы бойынша МКД бас маманы) қатысуымен, 90,2 млн теңге мөлшерінде пара сомасын берді.
«У.А.С. және К. сотталушылар жасаған іс-әрекеттердің заңсыздығын түсініп, Жамбыл облысы бойынша Сыбайлас жемқорлыққа қарсы қызметке аса ірі мөлшерде пара беру фактісі бойынша арызбен жүгінді. Осылайша, сотталушылар М. және Т.-ның қылмысы оларға байланысты емес мән-жайлар бойынша соңына дейін жеткізілген жоқ.
Сот сотталушылар М. және Т.-нің әрекеттеріндегі ауырлататын мән-жайлар ретінде қылмыс жасаудағы ерекше белсенді рөлдерін, ал У.-дың іс-әрекетінде – ол қабылдаған антын бұзуын таныды.
Сот үкімімен сот сотталушыларға белгілі бір лауазымдарды атқару құқығынан өмір бойына айыра отырып, М.-ға – 10 жыл, Т.-ға – 9 жыл және У.-ға 3 жыл бас бостандығынан айыру жазасын тағайындады. Т.-ға жаза тағайындау барысында оның егде жасы мен денсаулық жағдайы ескерілді. Сондай-ақ, сотталушылар Т. және У. сот залынан күзетке алынды. Үкім заңды күшіне енген жоқ», — делінген хабарламада.
