Италияның премьер-министрі Джорджа Мелони Рим Папасы Францисктың қайтыс болуына байланысты Қазақстанға сапарын кейінге қалдырды, деп хабарлады Президенттің кеңесшісі – баспасөз хатшысы Руслан Желдібай.
«Италия тарапынан түскен өтінішке сәйкес, Италия Премьер-министрі Джорджа Мелонидің Қазақстанға жоспарланған ресми сапары және «Орталық Азия – Италия» алғашқы саммиті Рим Папасы Францисктың қазасына байланысты өтетін қаралы шараларға қатысуына байланысты кейінге шегерілді. Жаңа мерзімдер тараптармен келісілуде. Уақыты туралы қосымша хабарланады», – деді Желдібай сәрсенбі күні.
Мелонидің Қазақстанға сапары 26–27 сәуірге жоспарланған болатын.
Айта кетейік, Рим Папасы Франциск 21 сәуір күні 88 жасында өмірден өтті. Қазақстан Президенті Қасым-Жомарт Тоқаев понтификтің қайтыс болуына байланысты көңіл айтты.
