Air Astana әуе компаниясының «Тбилиси – Алматы» бағыты бойынша ұшқан ұшағы Баку әуежайына мәжбүрлі түрде қонды.
«Air Astana әуе компаниясының Airbus A321 ұшағының капитаны Тбилиси – Алматы рейсі кезінде Гейдар Алиев атындағы халықаралық әуежайға мәжбүрлі қонуға сұраныс жасады», – деп мәлімдеді әуежайдың баспасөз қызметі.
Бұған ұшақ бортындағы жолаушылардың бірінің денсаулығының күрт нашарлауы себеп болған.
«Сұраныс түскеннен кейін әуежайдың дағдарыс орталығы шұғыл әрекетке көшіп, жергілікті қызметтер жедел түрде үйлестірілді және барлық қажетті қауіпсіздік шаралары қабылданды. Ұшақ жергілікті уақыт бойынша 00:25-те сәтті қонды. Жолаушыға дереу медициналық көмек көрсетіліп, жедел жәрдем бригадасына тапсырылды, содан кейін ол қала ауруханаларының біріне қосымша тексеруге жеткізілді. Осыған байланысты Air Astana әуе компаниясының шешімімен рейстің соңғы межеге ұшуы кейінге шегерілді. Қалған жолаушылар қонақүйге орналастырылды», – делінген хабарламада.
