Белгісіз тұлғалар кәріз құбырларын жүргізбек болып, газ құбырын зақымдаған.
16 қаңтарда Алматы қаласының Түрксіб ауданында орта қысымды жер асты газ құбыры зақымданды, деп хабарлайды «QazaqGaz Aimaq» АҚ баспасөз қызметі.
Белгісіз адамдар кәріз құбырларын орнату барысында асфальт қабатын тескен кезде газ құбырының тұтастығын бұзған.
«QazaqGaz Aimaq» апатты қалпына келтіру бригадасы зақымдалған учаскені жөндеу жұмыстарын бастап кетті.
Газбен жабдықтау 8 048 пәтер, 2 543 жеке үй және 67 кәсіпорын үшін уақытша тоқтатылды.
Тұрғындарға газ крандарын жауып, жөндеу жұмыстары аяқталғанша ашпау ұсынылады. Ал газ иісі пайда болған жағдайда, дереу 104 нөмірі арқылы апаттық қызметке хабарласу қажет.
