Ақтөбе қаласының соты 13 қаңтарда таныс әйелді кепілге алған және оны жеке үйде ұстаған 40 жастағы ер адамды қамауға алу туралы шешім шығарды. Сот шешімі бойынша күдікті екі ай бойы қамауда болады.
Оқиға қаладағы аудандардың бірінде орын алды. Ер адам таныс әйелді кепілге алып, үйде ұстаған. Бірақ ешқандай талап қоймаған. Үш сағаттық нәтижесіз келіссөздерден кейін және әйелді босатудан бас тартқаннан соң арнайы қызметтер шабуыл жасады. Әйел босатылып, күдікті қамауға алынды.
Оқиға орнында үйдің жертөлесінен кепілге алынған әйелдің қарт ата-анасы пышақ жарақаттарымен табылды. Екеуі де қайтыс болды. Тек әйел ғана тірі қалды. Қазір ол ауруханада жатыр және ата-анасының өлімінен хабарсыз.
Марқұмдар кеше жер қойнына тапсырылды. Жаназа қайғылы оқиға болған мекенжайда өтті. Сол уақытта айналада полиция көліктері кезекшілік етті. Қылмыстық іс «адам өлтіру» және «кепілге алу» баптары бойынша тергелуде.
