Орал қалалық сотында сәулет және қала құрылысы бөлімінің басшысы Мұратбек Тәшенбаевқа қатысты қылмыстық іс бойынша сот үкімі шықты. Ол пара алғаны және қызметтік өкілеттігін асыра пайдаланғаны үшін кінәлі деп танылып, жеті жылға бас бостандығынан айырылды. Сондай-ақ оған мемлекеттік қызметте жұмыс істеуге өмір бойына тыйым салынды.
Тәшенбаевпен бірге сотталушылар орындығында сәулет бөлімінің 27 жастағы бас маманы Нұрсұлтан Гатау мен «Асылжан» ЖШС-нің 41 жастағы директорының орынбасары Асылжан Құлбаев та болды. Гатау да пара алу және өкілеттігін теріс пайдалану бойынша кінәлі деп танылып, үш жыл алты айға сотталды. Ал Құлбаев пара бергені үшін жеті жылға бас бостандығынан айырылды.
Тергеу барысында Гатаудың кәсіпкерлерден рұқсат құжаттарын рәсімдеуге көмектесу үшін пара талап еткені анықталды. 2023 жылдың наурызында ол Құлбаевтан жер телімін рәсімдеу үшін 500 мың теңге сұраған. Кейін тағы бір адамнан заңсыз жер бөлу үшін 5 миллион теңге алған.
2024 жылдың басында Құлбаев Тәшенбаевқа коммерциялық ғимараттың эскиздік жобасын мақұлдау туралы өтінішпен жүгінген. Тәшенбаев бұл үшін 1 миллион теңге талап еткен. Оның және Гатаудың заңсыз әрекеттері салдарынан мемлекетке 92 миллион теңге көлемінде зиян келтірілген.
Үшеуі де кінәсін мойындап, процессуалдық келісім жасады. Сот шешімі бойынша олар сот залында қамауға алынды.
Үкім заңды күшіне енген жоқ және оған шағымдануға болады.
