Сыбайлас жемқорлыққа қарсы қызмет «Астана» футбол клубы мен «Барыс» хоккей клубында тексеру жүргізді. Мұнда миллиардтаған теңге тиімсіз жұмсалғаны анықталды.
Антикордың бірінші орынбасары Ұлан Сарқұлов, «Самұрық-Қазына» қорының қаржысын бөлу кезінде оның көбі легионерлердің жалақыларына жұмсалғанын атап өтті. Сонымен қатар, олардың көпшілігі қазір Қазақстан клубтарында ойнамайтыны белгілі болды.
«Логикалық сұрақ туындайды: мұндай қаражатты бөлу қаншалықты негізді? «Астана» футбол клубында толыққанды инфрақұрылым жоқ — кәсіби клубқа қажетті өз базасы жоқ. Сол сияқты «Барыс» хоккей клубында да жағдай ұқсас: алты жыл ішінде 49 млрд теңге бөлінді, оның басым бөлігі де шетелдік спортшылардың жалақыларына жұмсалды. Олардың көпшілігі бұрыннан командадан кеткен, ал бұл инвестициялардан тиімді нәтиже көрінген жоқ», — деді Сарқұлов мәжіліс кулуарларында.
Ол осы қаражатты әлдеқайда тиімдірек пайдалану мүмкіндіктері бар екенін атап өтті. Мысалы, спорт инфрақұрылымын дамытуға, балалар мен жастар үшін жағдай жасауға инвестиция салуға болар еді.
