Айыпталушы гүл дүкеніне инвестиция салу арқылы өзін табысты кәсіпкер ретінде көрсеткісі келген, деп мәлімдеді АФМ төрағасының орынбасары.
Biz Birgemiz Qazaqstan қайырымдылық қорының негізін қалаушы, белсенді Перизат Қайратқа қатысты қылмыстық іс аяқталды. Бұл туралы Қаржылық мониторинг агенттігі төрағасының орынбасары Жеңіс Елемесов хабарлады.
Іс бойынша келтірілген шығын көлемі – 3,5 млрд теңге. Қазір іске қатысушылар материалдармен танысу кезеңінен өтуде.
Агенттік төрағасы орынбасарының айтуынша, тергеу барысында қылмыстық жолмен алынған кірістерді заңдастыру фактілері анықталған. Перизат Қайрат ұрланған қаражатты гүл дүкенін сатып алуға жұмсап, өзін кәсіпкер ретінде көрсеткен.
«Осылайша, қоғамда өзін бизнес-леди ретінде таныстырып, табысын кәсіпкерлік саласынан алғандай етіп көрсеткен», – деді Елемесов.
Сот айыпталушыдан тәркіленген сөмкелер мен бағалы әшекейлердің тағдырын шешеді. Жеңіс Елемесовтың айтуынша, бұл мүлік жәбірленушілердің шығынын өтеуге немесе мемлекеттік кіріске аударылуы мүмкін.
Сонымен қатар, ол Перизат Қайратқа қаражатты қайырымдылық ретінде аударған азаматтар жәбірленушілер қатарына жататынын растады.
