Экс-мәжіліс спикері Нұрлан Нығматулиннің үлкен ұлы Нұржан Нұрлановқа рейдерлік жасады деген айып бойынша қылмыстық іс қозғалды. Бұл туралы KazTAG хабарлады.
«Аталған факті бойынша Алматы қаласы Полиция департаментінің тергеу басқармасы Қылмыстық кодекстің 389-бабы (өзінше билік ету) бойынша сотқа дейінгі тергеу жүргізуде. Қазіргі уақытта істің барлық мән-жайын жан-жақты, толық және объективті зерттеу үшін тергеу амалдары жүргізілуде», – деп хабарлады ҚР Ішкі істер министрлігі KazTAG редакциясының сұрауына.
Бұған дейін кәсіпкер Қанат Әміркин Нұржан Нұрланов оның «Алатаудорстрой» компаниясын тартып алып, одан ірі көлемде ақша талап еткенін мәлімдеген болатын.
«Тергеу жүріп жатыр. Компанияны қайта тіркеу фактісі бойынша әзірге «Өзінше билік ету» бабы қолданылады, бірақ мен бұл істің рейдерлікке қайта сараланатынын болжап отырмын. Сондай-ақ, Алматының Үлкен айналма жолы бойындағы жер телімін заңсыз иемдену бойынша алаяқтық бабымен де іс қозғалуы мүмкін», – деді Әміркин.
Нұржан Нұрланов 2019 жылдың ақпанынан 2022 жылғы Қаңтар оқиғасына дейін «ҚазМұнайГаз-Аэро» ЖШС-нің бас директоры болды. Оған дейін 2018 жылдың қаңтарынан бастап «Бәйтерек» ұлттық басқарушы холдингінің басқарма мүшесі қызметін атқарған. Бұған дейін де ол Қазақстанның квазимемлекеттік секторында бірнеше жоғары лауазымды қызметтерді иеленген.
Нұрлан Нығматулин 2022 жылдың 1 ақпанында мәжіліс спикері қызметінен кетті. Ол 2016 жылдан бері мәжілісті басқарған. Бұл оның екінші мәрте спикер болуы еді – бұған дейін ол 2012-2014 жылдары осы қызметті атқарған. Сондай-ақ, ол әр жылдары Президент әкімшілігін басқарды және Қарағанды облысының әкімі болды.
Нұрлан Нығматулиннің егіз сыңары Ерлан Нығматулин де әр жылдары мәжіліс және сенат депутаты болды. Ал олардың үлкен ағасы Арғын Нығматулин Қарағанды облыстық мәслихатының бұрынғы депутаты.
Нығматулиндер әулетіне бұған дейін бірнеше рет рейдерлік басып алу, қылмыстық топтармен байланыс және қылмыстық істерді қолдан ұйымдастыру айыптары тағылған. Бірақ олар әлі де бостандықта.
Айта кетейік, 2023 жылдың қарашасында «Әділдік жолы» ҚБ атқарушы директоры Дидар Смағұлов рейдерлікке қатысты мысал келтіре отырып, Қазақстанда табысты бизнестің қалай жоғалып, дәл сондай бизнестің Нығматулиндердің қолына өткенін атап өткен еді.
2025 жылдың 7 қаңтарында Нығматулиндердің рейдерлікке қатысты жаңа айыптаулардан кейін Президент Қасым-Жомарт Тоқаевты құлатуға дайындалғаны туралы күдік пайда болды. Бұл тұжырымға кәсіпкер Қанат Әміркиннің мәлімдемесінен кейін келген. Ол Нұрлан Нығматулиннің ұлы Нұржан Нұрлановты «Алатаудорстрой» компаниясын рейдерлікпен тартып алу және бопсалау әрекеттері үшін айыптаған еді.
