Қазақстан Республикасы Ұлттық қауіпсіздік комитетінің (ҰҚК) төрағасы Ермек Сағымбаев саяси арандатушылардың көпшілігі анонимді түрде әрекет ететінін мәлімдеді.
«ҰҚК ақпараттық кеңістікте деструктивті ақпарат таратумен айналысатын тұлғаларды анықтау және олардың әрекетіне тосқауыл қою бойынша қарқынды әрі жүйелі жұмыс жүргізуде. Жыл басынан бері интернетте заңсыз әрекеттерге, соның ішінде жаппай тәртіпсіздіктерге шақыратын деструктивті ақпарат таратқан 330 желі қолданушысы анықталды. Оның 29-ы қылмыстық жауапкершілікке, 30-ы әкімшілік жауапкершілікке тартылды, ал қалғандарына профилактикалық шаралар ұйымдастырылды. Алайда саяси сипаттағы арандатулардың басым көпшілігі анонимді түрде жүзеге асырылады және жиі шетелдік платформаларда тіркеледі», – деді Сағымбаев мәжіліс депутаты Ермұрат Бапидың сауалына жауап бере отырып.
ҰҚК басшысы мұндай жағдайларда арандатушыларды анықтау мен іздестіру қиынға соғатынын атап өтті.
«Сіздің сауалыңызда көрсетілген фактілер назарға алынып, алдағы уақытта жұмыс барысында ескерілетін болады. Егер болашақта осы мәселеге қатысты жаңа мәліметтер немесе фактілер анықталса, бізге хабарлауыңызды сұраймыз», – деп түйіндеді Сағымбаев.
Саяси реваншизмге қатысты пікірталас
Еске сала кетейік, қараша айында депутат Ермұрат Бапи «Ескі Қазақстанның» манипуляторлары мен реваншистерін анықтауға шақырған болатын. Депутаттың айтуынша, әлеуметтік желі арқылы Назарбаевтың үлкен қызы Дариға Назарбаеваны мақтайтын адамдар қоғамды тұрақсыздандыруға және ескі тәртіпті қайтаруға бағытталған арандатуларды ұйымдастыруда. Бапидың мәлімдемесі бойынша, олардың мақсаты – «Жаңа Қазақстанды» бөліп-жарып, әлеуметтік наразылықтар арқылы елді дестабилизациялау.
Бұл тақырып 13 желтоқсанда Ресей президентінің резиденциясында Нұрсұлтан Назарбаев пен Владимир Путиннің кездесуі туралы Кремльдің мәлімдемесінен кейін жаңа серпін алды. Осы кездесуден кейін мәжіліс депутаты Самат Нұртаза бұл жайтқа алаңдаушылық білдіріп, журналист Әсет Матаев «Бұл маңызды месседж ме, әлде саяси қателік пе?» деген сауал тастады.
Сонымен қатар, 21 желтоқсанда КазТАГ агенттігі Ермұрат Бапидың Назарбаевтың Путинмен кездесуін реваншизм әрекеттерімен байланыстырғанын хабарлады. Ол бұл кездесуді АҚШ-тағы «Қазақгейт-2» ісінің дайындалып жатқаны туралы қауесеттермен ұштастырып, экс-президенттің әрекеттерін саяси тұрғыдан тығырыққа тірелудің белгісі деп атады.
Қоғамдық алаңдаушылық
2024 жыл бойы «Ескі Қазақстанның» ықтимал реваншизміне қатысты алаңдаушылық күшейіп келеді. Қоғам өкілдері 2022 жылғы қаңтардағы қантөгістің босқа кетпеуін және ел басқаруына Назарбаев кланының қайта оралмауын қалайды. Сонымен қатар, мәжілісте әлі де экс-президенттің жақтастары бар болуы мүмкін деген болжамдар жасалуда.
Президент Қасым-Жомарт Тоқаев та бұл тақырыпқа тоқталып, 3 қаңтарда «Ана тілі» газетіне берген сұхбатында Назарбаевтың отставкадан кейін саяси әдептілік таныта алмағанын ашық айтты.
