Соңғы уақытта әлеуметтік желілерде және онлайн-хабарландыру платформаларында кез келген азаматтық санаттағы адамдарға минималды жеткіліктілік шегінен (МЖШ) асатын зейнетақы жинақтарын төмен пайызбен алуға делдалдық қызмет көрсету туралы ұсыныстар таратылуда, деп хабарлайды Tengrinews.kz Бірыңғай жинақтаушы зейнетақы қорының баспасөз қызметіне сілтеме жасап.
Осыған байланысты Бірыңғай жинақтаушы зейнетақы қоры (БЖЗҚ) өз салымшыларына ескерту жасайды: зейнетақы жинақтарын алу Қазақстанның Әлеуметтік кодексінде нақты көрсетілген жағдайларда ғана мүмкін. Олар:
— зейнет жасына жету;
— 1 немесе 2 топтағы мерзімсіз мүгедектік;
— тұрақты тұру үшін шетелге көшу (ПМЖ);
— мұрагерлік құқық бойынша алу.
Зейнетақы жинақтарын тұрғын үй жағдайын жақсарту немесе емделуге жұмсау тек заңмен белгіленген талаптарды орындаған жағдайда келесі санаттағы азаматтарға рұқсат етіледі:
— жинақтары МЖШ-дан асатын салымшылар (МЖШ-дан жоғары сома шегінде);
— зейнетақысы бұрынғы табысының кемінде 40 пайызына тең немесе одан жоғары зейнеткерлер – олар есепшоттарындағы жинақтың 50 пайызына дейін пайдалана алады;
— еңбек сіңірген жылдары үшін зейнетке шыққандар (жинақтардың 100 пайызына дейін);
— зейнетақы аннуитеті шартын жасаған салымшылар (жинақтардың 100 пайызына дейін).
Бірыңғай жинақтаушы зейнетақы қоры зейнетақы жинақтарын тұрғын үй сатып алу немесе емделуге мақсатты пайдалану тек екінші деңгейлі банктер арқылы уәкілетті операторлар арқылы жүзеге асырылатынын еске салады. Сондықтан делдалдардың қызметі мүлде қажет емес. Сонымен қатар, Бірыңғай жинақтаушы зейнетақы қоры ешқандай комиссия ұстамайды.
«Күмәнді схемаларға қатысуды қабылдап, сіз тек ақшаңыздан айырылып қалу қаупіне ұшыратып қана қоймай, жеке деректеріңіздің қауіпсіздігін де қатерге тіге аласыз. Бұл деректер кейіннен басқа алаяқтық әрекеттер үшін пайдаланылуы мүмкін. Бірыңғай жинақтаушы зейнетақы қоры өз салымшылары мен алушыларын мұндай ұсыныстарды елемеуге, тек ресми дереккөздерден ақпарат алуға және тек құқықтық алаңда әрекет етуге шақырады», – делінген қордың хабарламасында.
