«Менің ойымша, бұл болады. Бұл біздің халықаралық қауіпсіздігіміз үшін қажет», — деді АҚШ президенті Дональд Трамп НАТО Бас хатшысы Марк Рюттемен Ақ үйдің Овальды кабинетінде кездесу барысында. Бұл туралы NBC News хабарлады.
Марк Рютте өз кезегінде альянсты Гренландияның АҚШ-қа қосылу мәселесіне араластырғысы келмейтінін айтты.
The Wall Street Journal басылымының жазуынша, Трамп Гренландияны әскери жолмен алуды да қарастырып жатыр. Басылым мәліметінше, АҚШ әкімшілігінің өкілдері аралдағы америкалық әскери контингентті арттыру және тау-кен компанияларымен келісімшарттар жасасу туралы Даниямен талқылауға дайын екенін мәлімдеген. Алайда Трамп «Гренландияны алу үшін әскери жолды жоққа шығармайтынын» айтып, өз ниетінің байсалдылығын көрсеткен.
Басылым дереккөзі Ақ үйде Вашингтонға бұл стратегиялық маңызды аймақты иемденудің мүмкін механизмдері белсенді талқыланып жатқанын хабарлаған.
WSJ дереккөздері сондай-ақ, АҚШ Панама каналын бақылау мәселесінде Панамаға қысым көрсетуді жалғастырып жатқанын жеткізген. Ел билігі су жолының егемендігін сақтауға тырысуда, алайда Трамп «каналды АҚШ құрамына қайтарғысы» келеді. Ақ үй Панаманың кейбір жеңілдіктеріне қанағаттанғанымен, Вашингтонның аймақтағы ықпалын күшейтуге деген ұмтылысын жасырып отырған жоқ.
