Жезқазған соты сыбайлас жемқорлық ісі бойынша Дастан Тілеубековке, оның орынбасарына және екі кәсіпкерге үкім шығарды. Тергеу мәліметінше, өткен күзде Экология департаментінің басшысы Дастан Тілеубеков пен оның орынбасары жалпы көлемі 5 250 000 теңге пара алған.
Кейін, биылғы қаңтарда, Тілеубеков жеке өзі тағы 2 500 000 теңге алды. Шенеуніктер бұл ақшаны бизнеске көмектескені үшін алған. Сыбайлас жемқорлыққа екі кәсіпорынның қатысы бар. Ұлытау сотының ақпаратына сәйкес, белгілі бір ЖШС-лардың бас директорлары Сәтбаев қаласындағы экологиялық жобаларды және шығарындылар нормаларын мақұлдату үшін пара берген.
Аталған компаниялардың атауы жария етілген жоқ. Сондай-ақ тағы бір кәсіпкер Тілеубековке экологиялық рұқсат алу үшін пара берген. Алайда бұл эпизод бойынша қылмыстық іс (белгісіз себептермен) тоқтатылды.
Шенеуніктер мен кәсіпкерлер сот басталғанға дейін-ақ кінәларын толық мойындаған.
«Сот айыпталушылардың кінәні толық мойындауын, өкініш білдіруін және кейбірінің кәмелетке толмаған балалары барын жеңілдететін жағдай ретінде қарастырды. Сонымен қатар, Тлеубеков пен оның орынбасарының қызметтік антын бұзуы ауырлататын мән-жай ретінде танылды,» – делінген үкімде.
Тілеубеков пен оның орынбасары алты жылға бас бостандығынан айырылды. Ал екі кәсіпорын басшыларына 35 және 70 млн теңге айыппұл салынды.
Дастан Тілеубеков өңірлік департаментті 2022 жылдың қыркүйегінде басқарған. Ол Қарағандыда туған, сол жерде жоғары білім алған.
Карьерасын 90-жылдардың соңында «Нова Цинк» кәсіпорнында эколог болып бастаған. 2003 жылы мемлекеттік экология жүйесіне келіп, бас маманнан бастап, мемлекеттік бақылау департаментінің бөлім басшысына дейін көтерілген.
Ұлытау облысына келгенге дейін Экология министрлігіне қарасты экологиялық сараптама және рұқсат беру басқармасының басшысы болып қызмет атқарған.
Тілеубеков – парақорлық үшін сотталған жалғыз эколог емес. 2024 жылдың желтоқсанында Шығыс Қазақстан облысының бұрынғы бас экологы Данияр Әлиевке кәсіпкерден қамқорлығы үшін пара алғаны үшін сот үкімі шыққан.
Фото: Экология министрлігі
