Сот 2022 жылғы қаңтар оқиғалары кезінде Қошмамбет ауылында азаптау бойынша айыпталған бұрынғы полиция қызметкерлеріне үкім шығарды. Судья Адайбаев айыпталушылардың соңғы сөзін тыңдады. Олардың ешқайсысы кінәсін мойындамады.
Айыпталушылар қатарында Қарасай аудандық полиция басқармасының бес бұрынғы қызметкері және Алматы полиция департаментінің экс-басшысының орынбасары Берік Әбілбеков бар. Оларға ҚР Қылмыстық кодексінің 146-бабы («қатыгездік, адамгершілікке жатпайтын немесе ар-намысты қорлайтын әрекет, азаптау») және 362-бабы («қызметтік өкілеттіктерді асыра пайдалану») бойынша айып тағылды.
Еске сала кетейік, сот процесі 2023 жылдың қыркүйегінде басталған болатын. 44 жәбірленуші арасында әйгілі қырғыз джаз музыканты Викрам Рузахунов, сондай-ақ Қазақстан, Өзбекстан және Қырғызстан азаматтары бар.
Прокурор әр айыпталушыға үш жыл түрме жазасын сұраған болатын. Сот шешімі бойынша:
— Берік Әбілбеков — үш жыл.
— Серік Турпанбаев — үш жыл.
— Нұрсұлтан Хамитов — үш жыл.
— Бауыржан Сопақов — үш жыл.
— Арман Шойбеков — үш жыл.
Қаңтар оқиғасы кезінде тағылымдамадан өткен, ал қазір ұйымдасқан қылмыспен күрес басқармасының арнайы тобында жұмыс істейтін Олжас Айдархановқа да үш жыл берілді.
Барлығы шендерінен айырылды. Жазаларын орта қауіпсіздік деңгейіндегі колонияда өтейді.
Музыкант Викрам Рузахуновтың моральдық зиян келтіргені үшін азаматтық арызы ішінара қанағаттандырылды: оған моральдық шығын ретінде бес миллион теңге өтемақы төленеді. Айта кетейік, Рузахунов 61 миллион теңге талап еткен еді.
Айта кетсек, 2022 жылдың 7 қаңтарында ҰҚК шекара қызметі Алматыдағы тәртіпсіздікке қатысқандарды іздеу бойынша операция ұйымдастырған. Сол күні әскерилер Алматы – Бішкек тас жолында блокпост орнатып, 99 адамды, соның ішінде Рузахуновты ұстады.
Қамалғандар ресми түрде жұмыс істемеген Қошмамбет ауылындағы уақытша ұстау изоляторында азапталған.
