Желіде Абай облысының әкімі Нұрлан Ұранхаевтың қымбат брендтермен киініп, қыдырып жүрген қызының видеосы тарады. Жиырма жастағы бойжеткен әлеуметтік желідегі парақшасына 15 миллиондық алқасы мен 8 миллиондық жүзігін, Cartier брендінің 14 миллиондық алқасының суретін жүктеген. Әрі әкімнің қызында Hermes брендінің бірнеше сөмкесі бар екені байқалады. Ал ол сөмкелердің бағасы 21 миллион теңгеден асады.
Абай облысының әкімі Нұрлан Ұранхаев осыған дейін жалақысы 1 миллион 900 мың теңге екенін мәлімдеген болатын. Алайда оның қызының 21 милииондық сөмкемен жүргені желі қолданушыларын шамдандырды.
«Оның осы сауық-сайранының құны 14 адамның өмірімен өтелді», «Осы сөмкелермен қанша халықты қамтамасыз етуге болар еді», «Ал мұның орнына жабдықтар алуға болар еді», «Халықтың қауіпсіздігіне бөлінген қаражат кімнің қалтасында кеткені белгілі болды» деп жазды желі қолданушылары.
